جنرال مراد علي مراد د مقاومت سېلابي څپو وړی!

محمدکريم نور

د 209 نمبر شاهين قول اوردو سربولن جنرال مراد علي مراد له رويټرز خبري آژانس سره په مرکه کې ويلي دي چې ګواکي د اسلامي حزب غړي د طالبانو د پټنځايونو او فوځي کړو وړو په اړه افغان دولت ته څارګريز (استخباراتي) مالومات راټولوي . دغه خبر په همدې توګه په پښتو خبري وېبپاڼو کې هم خورا توود او لوړ ځای ونيو، خو روغ سول (عقل) او منطق يې رټي .

له بده مرغه د نړۍ په ټولو هېوادونو کې يوازېنی هغه افغانستان دی چې د وزګارو د شمېر په پرتله يې جنرالان ډېر دي . نو ځکه له داسې جنرالانو څخه هم د موزونې خبرې او څه ناڅه مناسبو تبليغاتو تمه نه شي کېدای . له همدې امله د شاهين قول اوردو سربولن، جنرال مرادعلي مراد هم په خپل فکر او پوهه واکمن نه دی . ده به هر ګوره په خپل اند ښه خبره کړې وي، خو د نظامي ځواکونو د ديسيپلين او کړنلارې پر بنسټ په يوه دولت کې د څارګرو ادارو د کړو وړو او د دوی د کارمنو او جاوسوسانو د پېژند بربنډول په خپله جرم دی . دغه جرم که هر څومره سپک هم وي، بيا هم نظامي نياوتون (محکمې) ته وړاندې کېږي چې ډېره وړه سزا يې د دوديزې محکمې پر پرتله ډېره درنه ده . که د جنرال مراد تور ريښتيا هم وي، نو دی خو په خپله د اوردو سربولن دی، د کوم قانون پر بنسټ همغه قانون ماتوي چې ده يې د ساتلو لوړه کړې ده؟

جنرال مراد علي وړاندې ځي چې دولت د اسلامي حزب غړو ته د مالوماتو په وړاندې روپۍ ورکوي . هر څوک پوهېږي چې افغان دولت د يوه کوشني ملکي دوتر د پر مختګ لپاره روپۍ له امريکا او ناټو هېوادونو څخه غواړي . د ټولنې کوم فاسېد غړی که په ريښتيا هم جاوسوسي کوي او د مقاومت د ځپلو په تمه وي، نو په بشپړ باور سره به يې امريکا، انګلستان او د ناټو نورو غړو هېوادونو ته وکړي چې يو څو روپۍ خو تر لاسه کړي . په افغان مفسېد دولت کې داسې څوک نشته چې د دولت د پايښت لپاره دې روپۍ په ريښتيا سره هم په هغه څه ولګوي چې ورته ځانګړې شوې وي . د روان فساد په پام کې نيولو سره هغه روپۍ چې يو جاوسوس يې له افغان دولته لاسته راوړي، د هغو روپيو لس سلنه (10 فيصده) هم نه ده چې له امريکا او نورو ناټو هېوادونو څخه يې تر لاسه کوي . نو بادار چې د خپل غلام په پرتله هم د مالوماتو تږی وي او هم تر غلامه ډېرې روپۍورکوي، نو کوم لېونی به بيا هم د بادار پر ځای د هغه غلام ته جاوسوسي کوي .

بلخوا د روانو نظامي او له دوی سره د غبرګو څارګريزو خوځښتونو او کړو وړو پر سر کې امريکا، انګستان او بيا په خپل وار د هر ښکېل ملک د نظامي ځواکونو مالوم مشران شتون لري . دوی په ټوليزه او ځانګړې توګه هر يو خپل څارګر او جاوسوسان لري چې د افغان دولت تر هغوی څخه يې مالومات کره او چټک دي . نو دا چې جګړه په ټوليزه توګه امريکا او ناټو هېوادونه پر مخ وړي، د افغان دولت د استخباراتو شتون او کړه وړه خپله مانا او وړتيا له لاسه ورکوي . تېرو تجربو زباد کړه چې افغان استخبارات نه په طالب پسې ګرځي او نه د اسلامي حزب په غړو پسې، بلکې امريکا او انګلستان ته ناسم مالومات ورکوي، بې وزله مظلوم پښتانه پې وژني او د دوی اختر، واده او د قران کريم ختم پې بمباردوي . پايله يې دا شوه چې امريکا، انګلستان او نورو همجرمو يې خپل نوم او پرېستيژ له لاسه ورکړ، مقاومت نور هم پراخه شو او د امريکا او ناټو ماتې هرو مرو شوه . نو که افغان دولت له دوی څخه د استخباراتو لپاره روپۍ وغواړي، ګومان نه کېږي چې امريکا يا انګلستان به يې ورکړي . ځکه چې دوی پوهېږي چې د سعدي عربستان د پادشا او د مصر د ولسمشر ټوکه ترې جوړېږي . (1)

د ښاغلي جنرال مراد علي مراد تور چې اسلامي حزب افغان دولت ته څارګريز مالومات راټولوي، هېڅ د منښت وړ نه ده، خو بيا هم يو ستر حقيقت انځوروي :

د امريکايي، انګليسي او نورو ناټويي جنرالانو په څېر جنرال مراد علي مراد هم د مقاومت سيلابي څپو وړی دی چې د ژغور په تمه د اوبو ځګ ته هم لاس اچوي .

(1) د سعودي عربستان پادشا د مصر  ولسمشر ته دوه زره ډالر ورکړل چې هغې فلسطينۍ سپين سرې ته يې ورکړي چې د تېلويزيون له لارې يې له ده څخه خيرات غوښتي ول . د مصر ولسمشر زر ډالر ځانته وګرځول اوپاتې زر يې خپل مرستيال ته ورکړل چې هغې مېرمني ته يې ورولېږ ي . مرستيال په خپل وار پينځه سوه ځانته وګرځول او پينځه سوه يې د ټولګټو وزارت وزير ته ورکړل چې هغې مېرمنې ته يې ورلېږي . وزير دوه نيم سوه ځانته وګرځول او دوه نيم سوه يې خپل مرستيال ته ورکړل چې هغې مېرمنې ته يې ورلولېږي . مرستيال دغه دوه نيم سوه ډالر په خپل جېب کې واچول او هغې مېرمنې ته يې وويل چې د سعدي عربستان پادشا له ولسمشر سره ژمنه وکړه چې تاته به په مکه مکرمه کې دعا وکړي چې الله ج د ټولې ستونزې حل کړي .